Камп’ютар для пачаткоўцаў

Падручнік па камп’ютару для пачаткоўцаў.

Уводзіны

Цяпер развіццё тэхналогій ідзе вельмі хутка, таму з чаго будзе складацца камп’ютар у далёкай будучыні я не ведаю. Сёння абагульніўшы яны складаюцца з вылічальнай адзінкі і памяці.

Купля камп’ютара

Перш за ўсё неабходна вызначыцца з мэтай куплі камп’ютара. У залежнасці ад яе могуць быць выбраны розныя характарыстыкі камп’ютара. Да камп’ютара для інтэрнэта, набора дакументаў і адукацыі патрабаванняў менш, чым калі ён набываецца для прафесійнай працы з графічнымі праграмамі і гульняў. Часам значэнне маюць наяўнасьць прываду для аптычных дыскаў (CD ці DVD), магчымасць далучацца да сеткі з дапамогай кабеля.

Тактавая частата цэнтральнага працэсара (вылічальнай адзінкі — па-англійску Central processing unit, скарочана CPU) паказвае, з якой хуткасцю працэсар апрацоўвае каманды. Такт — сігнал, які падаецца на працэсар адпаведным генератарам. Пры падачы такта з выкарыстаннем вызначанай каманды апрацоўваюцца лікі, якія знаходзяцца ў рэгістрах памяці цэнтральнага працэсара. Тактавая частата складае ў сярэднім ад 2 да 4 гігагерц (ГГц), зрэдку больш. У сучасных камп’ютарах працэсар мае два ці больш ядзер, кожнае з якіх працуе незалежна. Самыя танныя камп’ютары маюць тактаваую частату каля 1,3 ГГц. Калі ў вас няма планаў выкарыстоўваць камп’ютар для інтэнсіўных разлікаў ці гульняў, такой тактавай частаты хопіць. Некалькі ядзер выкарыстоўваюцца, каб праграмы маглі выконвацца не замінаючы адна адной (напрыклад, антывірус, прайгравальнік музыкі). Розныя ўкладкі броўзера, у рэшце рэшт, таксама выкарыстоўваюць розныя ядры працэсара.

Другім найважнейшым параметрам камп’тара з’яўляецца памяць. Варта адрозніваць аператыўную памяць і памяць дадзеных. Аператыўная памяць — энергазалежная. Калі камп’ютар выключыць, усё што захоўвалася ў аператыўнай памяці будзе сцертае. Для аператыўнай памяці важныя аб’ём і хуткасць працы шыны. Аб’ём памяці небходна выбіраць для адпаведных праграм, якія плануецца выкарыстоўваць. Для сучасных сістэм дастаткова 4 Гігабайт памяці. Хуткасць працы шыны вызначае хуткасць доступу да памяці. Шына — гэта электронныя злучэнні паміж працэсарам і памяццю. У сучасных камп’ютарах можна павялічваць аб’ём памяці. Для гэтага трэба проста набыць яшчэ адну адпаведную плату памяці, ці плату памяці большага аб’ёму і ўставіць яе ў камп’ютар.

Аперацыйная сістэма — гэта набор праграм, якія дазваляюць працаваць з камп’ютарам і ўсталёўваць іншыя праграмы. Зараз прадаюцца камп’ютары як з усталяванай аперацыйнай сістэмай, так і без яе. У першым выпадку камп’ютар ужо будзе гатовы да выкарыстання адразу пасля набыцця. У другім выпадку аперацыйную сістэму трэба ўсталёўваць асобна. У IBM-сумяшчальных камп’ютарах распаўсюджаныя аперацыйныя сістэмы Windows ды Linux.